ജോണ്‍സണ്‍ & ജോണ്‍സണിന്റെ കോവിഡ് വാക്‌സിൻ അടിയന്തര ഉപയോഗത്തിന് അനുമതി നൽകി അമേരിക്ക

ജോണ്‍സണ്‍ & ജോണ്‍സണിന്റെ കോവിഡ് വാക്‌സിന് യു എസ് അടിയന്തര ഉപയോഗ അനുമതി നൽകി. വാക്‌സിന്‍ ഉടന്‍ യുഎസില്‍ ഉപയോഗിച്ചു തുടങ്ങും. ഒറ്റഡോസ് ആയതിനാല്‍ വാക്‌സിന്‍ വിതരണം വേഗത്തിലാക്കാന്‍ സാധിക്കുമെന്നാണ് പ്രതീക്ഷ. കോവിഡിന്റെ പുതിയ വകഭേദത്തെ ഉള്‍പ്പെടെ തടയാന്‍ ഈ വാക്‌സിന്‍ ഫലപ്രദമാണെന്നാണ് പഠനം.തിങ്കളാഴ്ച മുതല്‍ രാജ്യത്ത് വാക്സിന്‍ ഡോസുകള്‍ എത്തിക്കും. കോവിഡ് പ്രതിസന്ധിക്ക് അറുതി വരുത്താന്‍ നിര്‍ണായകമായ മുന്നേറ്റമാണ് ഇതെന്ന് യുഎസ് പ്രസിഡന്റ് ജോ ബൈഡന്‍ പറഞ്ഞു. കോവിഡിനെ തുടര്‍ന്ന് അമേരിക്കയിൽ ഇതുവരെ 5.10 ലക്ഷം പേരാണ് മരണപ്പെട്ടത്. ഇതിന്റെ കൂടി പശ്ചാത്തലത്തിലാണ് മൂന്നാമത്തെ വാക്സിന് അമേരിക്ക അനുമതി നല്‍കിയത്.ജോണ്‍സണ്‍ & ജോണ്‍സണിന്റെ ഒറ്റ ഡോസ് വാക്‌സിൻ കോവിഡ് ഗുരുതരമായവരില്‍ 85.8 ശതമാനമാണ് ഫലപ്രാപ്‌തി. ആഫ്രിക്കയില്‍ നടത്തിയ പഠനത്തില്‍ 81.7 ശതമാനവും ബ്രസീലില്‍ നടന്ന പഠനത്തില്‍ 87.6 ശതമാനവും ഫലപ്രാപ്തി ലഭിച്ചതായി അധികൃതര്‍ വ്യക്തമാക്കി. ജോണ്‍സണ്‍ ആന്റ് ജോണ്‍സണ്‍ കമ്പനി യൂറോപ്പിലും വാക്സിന്റെ അടിയന്തിര ഉപയോഗത്തിനായി ലോകാരോഗ്യ സംഘടനയില്‍ നിന്നു അനുമതി തേടിയിട്ടുണ്ട്.