കുവൈത്ത് സിറ്റി: രാജ്യത്ത് വിവിധ നിയമലംഘനങ്ങൾ കണ്ടെത്തുന്നതിനായുള്ള പരിശോധന തുടരുകയാണ്. താമസ, തൊഴിൽ, ഗതാഗത നിയമങ്ങൾ തുടങ്ങിയവയുടെ ലംഘനങ്ങൾ കണ്ടെത്തുന്നതിന് കർശന പരിശോധനകളാണ് അധികൃതർ നടത്തിവരുന്നത്.
വിവിധ പ്രദേശങ്ങളിൽ ആഭ്യന്തര മന്ത്രാലയം നടത്തിയ സുരക്ഷ പരിശോധനയിൽ 30 പ്രവാസികളാണ് പിടിയിലായത്. താമസ, തൊഴിൽ നിയമങ്ങൾ ലംഘിച്ചതിനാണ് ഇവരെ അറസ്റ്റ് ചെയ്തത്. വിവിധ രാജ്യങ്ങളിൽ നിന്നുള്ള ഇവർക്കെതിരെ നിയമനടപടികൾ സ്വീകരിക്കുന്നതിന് ബന്ധപ്പെട്ട അധികാരികൾക്ക് കൈമാറി.
അഹമ്മദി ഗവർണറേറ്റ് സെക്യൂരിറ്റി ഡയറക്ടറേറ്റ് നടത്തിയ പരിശോധനയിൽ ഗതാഗത നിയമലംഘനങ്ങൾക്ക് നിരവധി പേർക്കെതിരെയാണ് നടപടിയെടുത്തത്. ലൈസൻസില്ലാതെ വാഹനം ഓടിച്ചതിന് 13 കൗമാരക്കാരെ ജുവനൈൽ ഡിപ്പാർട്മെന്റിലേക്ക് റഫർ ചെയ്തു. 10 വാഹനങ്ങൾ പിടിച്ചെടുക്കുകയും 56 ട്രാഫിക് നിയമലംഘനങ്ങൾ റിപ്പോർട്ട് ചെയ്യുകയും ചെയ്തു.
താമസ, തൊഴിൽ നിയമങ്ങൾ ലംഘിച്ചതിന് ഏഴുപേരെ അറസ്റ്റ് ചെയ്തു. മറ്റു വിവിധ കേസുകളിലായി 10 പേർക്കെതിരെയും നടപടിയെടുത്തു. നിയമലംഘനം നടത്തുന്നവർക്കെതിരെ ശക്തമായ നടപടി സ്വീകരിക്കുമെന്ന് അധികൃതർ അറിയിച്ചു.
