കുവൈത്തിൽ അടുത്ത ദിവസങ്ങളിൽ അന്തരീക്ഷ താപനിലയിൽ ഗണ്യമായ കുറവുണ്ടാകുമെന്ന് പ്രതീക്ഷിക്കുന്നതായി കാലാവസ്ഥാ വിദഗ്ധൻ ഇസ്സ റമദാൻ അറിയിച്ചു. രാജ്യത്ത് വേനൽ കാലം അവസാന ഘട്ടത്തിലൂടെയാണ് കടന്ന് പോകുന്നത്. രാജ്യത്ത് നിലവിൽ 44-48 ഡിഗ്രി സെൽഷ്യസ് വരെയാണ് താപനില രേഖപ്പെടുത്തുന്നത്. ഈ ആഴ്ചയോടെ താപനിലയിൽ മാറ്റമുണ്ടാകുമെന്നും അടുത്ത ദിവസങ്ങളിൽ 40-42 ഡിഗ്രി സസെൽഷ്യസിലേക്ക് താപനില കുറയുമെന്നാണ് പ്രതീക്ഷയെന്നും അദ്ദേഹം പറഞ്ഞു.
സുഹൈൽ നക്ഷത്രം സെപ്റ്റംബർ നാലിന് ആകാശത്ത് പ്രത്യക്ഷപ്പെടുന്നതോടെ താപനില കുറയുമെന്ന് നേരത്തെ അൽ ഉജൈരി സയന്റിഫിക് സെന്ററും വ്യക്തമാക്കിയിരുന്നു. ഘട്ടംഘട്ടമായാണ് താപനിലയിൽ മാറ്റമുണ്ടാവുക. അറബ് രാജ്യങ്ങളിൽ മത്സ്യബന്ധനത്തിനും കൃഷിക്കും അനുയോജ്യമായ സമയം നിശ്ചയിക്കുന്നത് സുഹൈൽ നക്ഷത്രത്തെ ആശ്രയിച്ചാണ്.
