കുവൈത്ത് സിറ്റി: അമേരിക്കൻ പ്രസിഡന്റ് തെരഞ്ഞെടുപ്പിൽ ചരിത്ര വിജയം നേടിയ ഡോണൾഡ് ട്രംപിന് അഭിനന്ദനങ്ങൾ അറിയിച്ച് കുവൈത്ത് അമീർ ഷെയ്ഖ് മിഷാൽ അൽ അഹമ്മദ് അൽ ജാബർ അൽ സബാഹ്. ട്രംപിനെ അഭിനന്ദിച്ച് അദ്ദേഹം സന്ദേശമയച്ചു. ഇരു രാജ്യങ്ങളും തമ്മിലുള്ള ദീർഘവും ശക്തവുമായ ചരിത്ര ബന്ധത്തെ കുറിച്ച് അദ്ദേഹം സന്ദേശത്തിൽ പറയുന്നു.
ബന്ധങ്ങൾ ശക്തിപ്പെടുത്തുന്നതിന് ഇരു രാജ്യങ്ങളും തമ്മിലുള്ള പങ്കാളിത്ത സഹകരണം എല്ലാ മേഖലകളിലും വിപുലീകരിക്കാൻ കഴിയട്ടെയെന്ന് അദ്ദേഹം ആശംസിച്ചു. വൈസ് പ്രസിഡന്റായി തിരഞ്ഞെടുക്കപ്പെട്ട ജെയിംസ് വാൻസിനെയും അമീർ അഭിനന്ദിച്ചു. നിയുക്ത അമേരിക്കൻ പ്രസിഡന്റിനും വൈസ് പ്രസിഡന്റിനും ഒപ്പം, യുഎസിന് സമൃദ്ധിയും പുരോഗതിയും നേരുന്നതായി കുവൈത്ത് കിരീടാവകാശി ഷെയ്ഖ് സബാഹ് ഖാലീദ് അൽ ഹമദ് അൽ സബാഹ് വ്യക്തമാക്കി. കുവൈത്ത് പ്രധാനമന്ത്രി ഷെയ്ഖ് അഹമ്മദ് അബ്ദുള്ള അൽ അഹമദ് അൽ സബാഹും തിരഞ്ഞെടുക്കപ്പെട്ട ഇരു നേതാക്കൾക്കും ആശംസകൾ നേർന്നു.
