കുവൈത്ത് സിറ്റി: പൗരന്മാരുടെ കടങ്ങൾ വീട്ടുന്നതിനുള്ള മൂന്നാമത്തെ ദേശീയ ക്യാമ്പയ്ന് വേണ്ടി ശേഖരിച്ചത് 7 ദശലക്ഷം കുവൈത്ത് ദിനാർ. പത്ത് ലക്ഷം ദിനാർ ആണ് കഴിഞ്ഞ ദിവസം കുവൈത്ത് ഔഖാഫ് സംഭാവന നൽകി. ഇതുമായി ബന്ധപ്പെട്ട് ഔഖാഫ് സെക്രട്ടേറിയറ്റ് ജനറൽ സാമൂഹിക കാര്യ മന്ത്രാലയത്തിന് കത്ത് അയച്ചു. 15,325 ദാതാക്കളാണ് കാമ്പയ്നിൽ ഇതുവരെ പങ്കാളികളായതെന്ന് അധികൃതർ അറിയിച്ചു.
ദേശീയ കാമ്പയ്നിൽ ജനങ്ങൾ പ്രകടിപ്പിക്കുന്ന ഉദാരത രാജ്യത്തിന്റെ ചരിത്രത്തിലെ മറ്റൊരു തിളങ്ങുന്ന അധ്യായമാണെന്ന് സാമൂഹികകാര്യ മന്ത്രിയും കുടുംബ-ബാല്യകാര്യ സഹമന്ത്രിയുമായ ഡോ. അംതാൽ അൽ-ഹുവൈല അറിയിച്ചു. ഏപ്രിൽ 14 വരെയാണ് ക്യാമ്പയ്ൻ നടക്കുന്നത്.
രാജ്യത്തെ ചാരിറ്റി സംഘടനകളും ആയി സഹകരിച്ചാണ് പദ്ധതി നടപ്പിലാക്കുന്നത്. സാമൂഹികകാര്യ മന്ത്രാലയം നേരിട്ടാണ് പദ്ധതിയുടെ മേൽനോട്ടം വഹിക്കുന്നത്. പരമാവധി 20,000 ദിനാർ വരെയാണ് പദ്ധതിയിലൂടെ സഹായമായി നൽകുന്നത്. ക്രിമിനൽ റെക്കോർഡ് ഇല്ലാത്ത കുവൈത്തി പൗരന്മാരെയും സാമ്പത്തിക ബാധ്യതയുള്ളവരെയും സഹായിക്കുന്നതിന് വേണ്ടിയാണ് പദ്ധതി നടപ്പിലാക്കുന്നത്. കടം തിരിച്ചടയ്ക്കാൻ കഴിയാത്തതിന്റെ ഔദ്യോഗിക രേഖകൾ ഹാജരാക്കണമെന്നും അധികൃതർ കൂട്ടിച്ചേർത്തു. നിയമനടപടികൾക്ക് വിധേയരായവർക്ക് നീതിന്യായ മന്ത്രാലയത്തിന്റെ സിവിൽ എൻഫോഴ്‌സ്‌മെന്റ് വഴിയാണ് പണം നൽകുന്നത്.
