കുവൈത്ത് സിറ്റി: കുവൈത്തിൽ നായ്ക്കളെ വളർത്തുന്നവർക്കായി കർശന മാർഗനിർദേശങ്ങൾ. ആഭ്യന്തര മന്ത്രാലയമാണ് ഇതുസംബന്ധിച്ച മാർഗനിർദ്ദേശങ്ങൾ പുറപ്പെടുവിച്ചത്. നിയമങ്ങൾ ലംഘിക്കുന്നവർക്ക് ഒരു മാസം വരെ തടവോ 30 ദിനാറിലധികം പിഴയോ അല്ലെങ്കിൽ രണ്ടും കൂടിയോ ലഭിക്കുമെന്ന് മന്ത്രാലയം അറിയിച്ചു.
പൊതുജനങ്ങളുടെ സുരക്ഷ ഉറപ്പാക്കുന്നതിനും മൃഗങ്ങളുടെ സംരക്ഷണത്തിനും താമസമേഖലകളിലും പൊതുസ്ഥലങ്ങളിലും ശുചിത്വം നിലനിർത്തുന്നതിനുമാണ് പുതിയ നിർദേശങ്ങൾ പുറപ്പെടുവിച്ചിരിക്കുന്നത്. നായ്ക്കളെ വളർത്തുന്നവർ നിർബന്ധമായും ഔദ്യോഗിക ലൈസൻസ് നേടിയിരിക്കണമെന്നാണ് മാർഗനിർദ്ദേശത്തിൽ വ്യക്തമാക്കിയിട്ടുള്ളത്. ഓരോ നായയുടെയും കഴുത്തിൽ തിരിച്ചറിയൽ നമ്പർ രേഖപ്പെടുത്തിയ മെറ്റൽ ടാഗോടുകൂടിയ കോളർ ഉണ്ടായിരിക്കണം. അംഗീകൃത വെറ്ററിനറി കേന്ദ്രങ്ങളിൽ നായ്ക്കളെ ആരോഗ്യപരിശോധനയ്ക്ക് വിധേയമാക്കുകയും പേവിഷബാധയ്‌ക്കെതിരായ പ്രതിരോധ കുത്തിവയ്പ്പുകൾ നൽകുകയും വേണം. വർഷംതോറും ബൂസ്റ്റർ വാക്‌സിനേഷനും നിർബന്ധമാണ്.
പൊതുറോഡുകളിലും നടപ്പാതകളിലും മറ്റ് പൊതുസ്ഥലങ്ങളിലും നായ്ക്കളുമായി പുറത്തിറങ്ങുമ്പോൾ നിയന്ത്രണച്ചങ്ങലയും വായ്മൂടിയും ഉപയോഗിക്കണം. നായയ്ക്ക് പേവിഷബാധയുണ്ടെന്നോ രോഗബാധ സംശയിക്കുന്നതായോ കണ്ടെത്തിയാൽ ഉടൻ വെറ്ററിനറി കേന്ദ്രത്തെ അറിയിക്കണം. പേവിഷബാധയേറ്റതോ രോഗബാധ സംശയിക്കുന്നതോ ആയ മൃഗങ്ങളുടെ ജഡങ്ങൾ അധികൃതരുടെ നിർദേശമില്ലാതെ സംസ്‌കരിക്കുന്നതും നിരോധിച്ചിട്ടുണ്ട്. ലൈസൻസ്, തിരിച്ചറിയൽ രേഖകൾ, പ്രതിരോധ കുത്തിവയ്പ്പുകൾ എന്നിവ സംബന്ധിച്ച എല്ലാ നിയമങ്ങളും നായ്ക്കളുടെ ഉടമകൾ കർശനമായി പാലിക്കണമെന്ന് ആഭ്യന്തര മന്ത്രാലയം കൂട്ടിച്ചേർത്തു.
